Президент Жолдауы – ел дамуының стратегиялық бағдары

Қазақстан Республикасы Президентінің Жолдауы – мемлекеттің даму бағыттарын айқындайтын және алдағы кезеңге арналған басым міндеттерді белгілейтін маңызды құжат. Онда еліміздің әлеуметтік-экономикалық дамуы, халықтың әл-ауқатын арттыру, қоғамдық келісімді нығайту және азаматтар үшін жаңа мүмкіндіктер қалыптастыру мәселелері кеңінен қамтылған.

Мемлекет басшысы белгілеген ауыл шаруашылығын, энергетиканы, өнеркәсіпті, көлік-логистика инфрақұрылымын және құрылыс саласын дамыту міндеттерінің маңызы зор. Бұл бағыттар ауылдық өңірлер, соның ішінде Есіл ауданы үшін де ерекше өзекті. Агроөнеркәсіптік кешенді дамыту, жол инфрақұрылымын жақсарту, жаңа жұмыс орындарын ашу және мемлекеттік қызметтердің сапасын арттыру – халықтың күнделікті өміріне тікелей әсер ететін маңызды мәселелер.

Жолдауда экономикалық көрсеткіштермен қатар, адамға, оның әл-ауқатына, қауіпсіздігіне және өзін-өзі дамыту мүмкіндіктеріне ерекше назар аударылғаны маңызды деп санаймын. Өйткені қуатты мемлекет әрбір отбасының берекесі мен бақуаттылығынан, сапалы білім мен медицинаның қолжетімділігінен, азаматтардың ертеңгі күнге деген сенімінен басталады.

Азаматтық жауапкершілік мәселесі де айрықша маңызға ие. Әрқайсымыз туған өлкеміздің дамуына өз үлесімізді қосып, қоғамдық бастамаларды қолдап, отбасылық құндылықтарды сақтап, өскелең ұрпақты еңбекке, заңға және Отанға құрметпен қарауға тәрбиелеуіміз қажет.

Есіл ауданының Аналар кеңесінің төрағасы ретінде алға қойылған міндеттердің жүзеге асуы қоғамның бірлігіне, азаматтардың белсенді ұстанымына және мемлекет пен халықтың бірлескен жұмысына байланысты деп есептеймін. Президент Жолдауы – жай ғана тапсырмалар жиынтығы емес, нақты істер мен оң өзгерістерге бастайтын бағдар.

Белгіленген басым бағыттардың жүйелі түрде жүзеге асуы еліміздің экономикалық әлеуетін нығайтып, халықтың өмір сүру сапасын арттырып, келер ұрпақ үшін берік негіз қалыптастыратынына сенімдімін.

Башимбаева Зауреш Уалихановна,
Есіл ауданы Аналар кеңесінің төрағасы.