Ақмола облысында жылу желілерінің тозу деңгейі жаңа жылыту маусымына қарай 35%-ға дейін төмендейді

Өңірдегі өткен жылыту маусымы штаттық режимде аяқталып, 50 мың абонент үшін жылумен қамту сапасын арттыруға мүмкіндік берді. Жүргізілген жөндеу жұмыстарының нәтижесінде облыс бойынша желілердің орташа тозу деңгейі 2%-ға төмендеді, ал келесі қысқа қарай бұл көрсеткішті 35%-ға дейін жеткізу жоспарланып отыр. Алдағы жылыту маусымына дайындық барысы және іске асырылатын жобалар туралы Өңірлік коммуникациялар қызметінде өткен брифингте Энергетика және тұрғын үй-коммуналдық шаруашылық басқармасының басшысы Бақтияр Жапаев баяндады.

2026–2027 жылдардағы жаңа маусымға дайындық жұмыстары қазірдің өзінде басталған. Жоспарға сәйкес 36 шақырымнан астам жылу желілерін қайта жаңарту және бес ірі нысанды іске қосу көзделіп отыр. Ауқымды жұмыстар Степногорск, Атбасар және Щучинск қалаларын қамтиды. Сонымен қатар облыс бойынша тоғыз өңірде 24 қазандық ауыстырылып, Көкшетау қаласындағы Красный Яр шағын ауданын қоса алғанда үш жаңа блокты-модульдік қазандық іске қосылады.

«Жөндеу науқанының басты мақсаты – үйлерді үздіксіз жылумен қамтамасыз ету. Тек Степногорск, Балкашино, Атбасар және Щучинск қалаларындағы бес негізгі жобаның аяқталуының өзі 17 мыңнан астам абонентті тұрақты жылумен қамтуға мүмкіндік береді. Біз тозу деңгейі жоғары аймақтардың әрқайсысымен нысаналы түрде жұмыс жүргізіп келеміз», – деді Бақтияр Жапаев.

Ерекше назар Степногорск қаласына аударылған. Мұнда ЖЭО-ның тозу деңгейін 54%-ға дейін төмендету жоспарланған. Сондай-ақ Көкшетауда РК-1 және РК-2 қазандық жабдықтарын жаңғырту жұмыстары жалғасуда, бұл қуат көздерінің тозуын 41%-ға дейін азайтуға мүмкіндік береді. Бұдан бөлек, қаланың энергетикалық қауіпсіздігін қамтамасыз ету мақсатында жаңа Көкшетау ЖЭО-сының инфрақұрылымын жобалау жұмыстары жүргізілуде, оның бірінші кезеңін іске қосу 2028 жылға жоспарланған.

Электрмен жабдықтау саласында да 2 мың шақырымнан астам электр беру желілерін жаңарту жоспарланған. Бұл тек желілердің тозуын азайтып қана қоймай, ауылдық елді мекендерде электр энергиясын жеткізудің сенімділігін арттыруға мүмкіндік береді.

«Біз жүйелі жоспарлауға көштік: келесі қысқа дайындық алдыңғы маусым аяқталған күннен бастап басталады. Бұл тендерлерді уақтылы өткізіп, материалдарды алдын ала сатып алуға мүмкіндік береді. Соның нәтижесінде күзге қарай барлық нысандар 100% дайын болады», – деп атап өтті басқарма басшысы.